استخدمي الزيت بعد استخدامه وعملي بيه صابونه

زائر

مساكم / صباحكم فل يا عدولات
يا ترى بتعملوا ايه في الزيت بعد ما تحمرى فيه بترميه؟ ولو بترمية. بترميه فين؟ في الحوض او البالوعة حيسده ويسبب لك مشاكل . دى كانت مشكلة ازلية عندى لحد من كام سنة عرفت الطريقة دى وبقيت اعملها وفرقت معايا كتير وعلشان انتوا حبايبي حقولكم عليها ويا رب تعجبكم زى ما عجبتني.
يالا مع بعض نعمل صابون من زيت التحمير
المقادير
3 لتر زيت سبق استخدامه
نصف كيلو بوتاس
كيلو دقيق
لتر ماء
قشر ليمون
او رائحة ليمون
الطريقة
انا بجمع قشر الليمون وليه استخداماته اللي حقولهالكم في مواضيع تانية المهم باخد قشر الليمون واحطه في لتر الماء واغليه علشان يديني رائحة حلوة والليمون مفيد لليد وبسيبه لما يبرد واجيب طبق بلاستيك عميق واضع البوتاس بالراحة لانه بيكوى واضيف ليه الماء واقلبه بالراحة جداً مفروض بحاجة خشب انا هنا قلبت ببلاستيك بيعمل دخان وبسيبه خالص لما يهدا

هنا بعد ما هدى خالص بيبقي بلون المياه العادية

وبعدين بصفي الزيت بمصفاة سلك من اي شوائب وبدفيه علي البوتجاز واروح حطاه علي البوتاس واقلب لحد ما الاقيه بيتقل معايا والتفاعل بتاعهم ده بينتج منه جلسرين يعني مفيد لليد جداً وابدأ اضيف الدقيق لحد ما يديني السمك المطلوب انت بتحسي بالسمك اللي انتي محتجاه

وبعد كده عندى صندوق رنجة خشب او لو عندك اي صندوق خشب او درج قديم او حتي سبت بلاستيك قديم من بتوع البصل والطاطس وبفرشه مشمع واصب فيه العجينة بالراحة وخلي بالك بيكون سخن جداً من البوتاس اوعي يلمس ايدك وببدأ اساوية وممكن اعمل عليه اشكال او حتي تكتبي الحرف الاول من اسمك

الصور دى من 3 مرات عملته حتلاقوا مره لونة غامق علشان حطيت مع الميه قشر لارنج كنت بعمل مربي وقلت استفيد من القشر

عملت عليه خطوط بملعقة خشب قديمة علشان يبقي شكله حلو ومرة تانية كتبت حرف s علي كل صابونة

المهم يا قمرات بسيبه في البالكونة يوم بينشف وبيكون سهل التقطيع قطعية زى ما انتي عايزة مكعبات او مستطيلات
وسيبيه يكمل نشفانه

بيكون تحفة في غسيل الحلل الالمونيوم والاستانلس وياقات قمصان جوزك بيخليها زى الفل وطبعاً الشربات.

اه مشكورة
زيت يتحول صابون غريبة هههه