طريقة عمل جيبة اطفال وفراشة

[ندعوك للتسجيل في المنتدى أو التعريف بنفسك لمعاينة هذه الصورة]

زى ما اتفقنا هبدء بشرح بترون الجيبة الاول

نبدء بسم الله:

دى مصطلحات هنستخدمها عشان تبقى عارفاها

س=سلسلة
ع=عمود
صدفة =(2عمود+2سلسلة +2عمود)كله فى نفس المكان
غ ح =غرزة حشو

نبدء باسم الله

اولا : تعملى سلسلة بمحيط الوسط

ثانيا:تعملى غ ح فوق كل سلسلة انتى اشتغلتيها

السطر الاول :اطلعى 3 س (كابديل عن اول عمود) وفى نفس المكان تعملى 1ع +2س+2ع

كل ده فى نفس المكان وبعد كدة تعملى 1س

وبعدة كدة سيبى من تحت 3س واعملى فى الرابعة صدفة اللى هى (2ع+2س+2ع)

ماشى كدة وبعد كدة بعد ما انتى عملتى الصدفة تعملى 1 س

وبرضو تتركى 3س من تحت وفى الرابعة تعملى صدفة وبعد الصدفة تعملى 1س

وتمشى كدة لاخر السطر

بس نلاحظ هنا ان بين كل صدفة وصدفة 1س

بعد ما خلصتى السطر الاول شوفى عدد الصدفات كام صدفة وشوفيه يقبل القسمة على 3 ولا لا

لو كان يقبل يبقى كدة تمام

ولو مش قبل القسمة ابقى حاولى توفقى يعنى يا تزودى صدفة او تنقصى صدفة بس طبعا من غير ما تفكى الشغل كله فهمتى قصدى

بعد ما اتاكدنا ان عدد الصدفات يقبل القسمة على 3 نقفل السطر بغرزة منزلقة عشان نبدء السطر التانى

السطر التانى :

هنمشى بمنزلقة لحد نصف الصدفة الاولى (اللى هى ال2 س اللى فى نصف الصدفة ) ونعمل فيها 3 س كبديل عن اول عمود ثم 2س ثم 2عمود

ملحوظة مهمة : البداية دى هتكون بداية كل السطور الجاية اللى بتبدأبصدفات

وبعدها 1س ونكمل زى السطر الاول بالضبط بس الاختلاف هنا اننا هنعمل فوق الصدفة صدفة او بمعنى اخر هنعمل صدفة فى ال2س بتوع الصدفة اللى تحتها

خلاص كدة ونمشى بقى لنهاية السطر

من السطر الثالث للسطر للسابع هو هو السطر التانى
بس نخلى بالنا من البداية هى هى نفس البداية

وخلى بالك برضو من موضو ع الطول يعنى لو هتعملى البترون ده فى جيبة لبنوتة مش زى ماتعمليه لوحدة كبيرة اقصد يعنى من حيث الطول لو بنوتة امشى عادى على البترون ولو لواحدة كبيرة هتعوزى تكترى الصفوف شوية يعنى مثلا بدل من السطر ال3 : السطر اال7

خليها مثلا من ال3 :ال11 او ال12 حسب الطول بقى

فهمتى قصدى

انتى اللى بتحددى لكن انا بشرحلك البترون بس

ومن السطر التامن للسطر ال12

هو هو السطور اللى فاتت مع اختلاف اننا فى السطور اللى فاتت كنا بنعمل بين الصدفات سلسلة واحدة بس

لا بقى هنا من ال8 هنعمل بين الصدفات وبعض 2 سلسلة لحد السطر ال12

وبرضو خدى بالك من الطول
السطر ال13والسطر ال14 تعملى نفس السطور اللى فاتت بس نعمل بين الصدفات 3س

الزيادة دى عشان تعمل كرانشة

السطر ال15 هتعملى بين الصدفات 5 س

البترون بس فى اجزاء ملخبطة شوية فانا هشرح بقى من بترون عندى هو هو البترون بتاعك ونفس الشكل انا اشتغلت منه قبل كده اهو حتى ال فستان اللى استخدمت منه البترون اللى هشرحلك منه هو هو بس بصورة اوضح

[ندعوك للتسجيل في المنتدى أو التعريف بنفسك لمعاينة هذا الرابط]

السطر ال16 ركزى بقى

هنشتغل عادى البداية وهنعمل عادى فوق كل صدفة صدفة بين كل واحدة والتانية 5 س

بس هنشتغل هنا اول 3 صدفات ونجى عندال5 س اللى بين الصدفة ال3 والصدفة الرابعة مش هنشتغلهم

هنعمل 2س و2 عمود و2 س (ده فوق ال5س اللى تحت)وبعد كدة نعمل الصدفة الرابعة والخامسة والسادسة عادى خالص وفى ال5س اللى بين الصدفة ال6 ةالسابعة نعمل برضو 2س و2ع و2س ونكمل بقى عادى نعمل 3صدفات ثم نعمل ال(2س و2ع و2س) و3صدفات ونكرر برضو اللى بين الاقواس لحد نهاية السطر

السطر ال17 وال18

هنشتغل عادى زى السطر ال16 مع ملاحظة اننا كنا بنشتغل فى السطر ال16، 3صدفات وبعد كدة 2س و2ع و2س وبنكمل عادى

لكن هنا فى السطر ال17 وال18 هنشتغل برضو 3صدفات لكن هنعمل 3س و 2ع و3س ونكمل بقى لنهاية السطر ال17

ونكرر برضو ده فى السطر ال18

السطر ال19:هنشتغل اول صدفة اللى هى كانت (2ع+2س+2ع) وبعد كدة هنعمل 5س

الصدفة التانية هنعمل (2ع+5س+2ع)ونعمل برضو ال5س

الصدفة الثالثة نفس الصدفة الاولى بس
وفى الطريق بين الصدفة ال3 الى الصدفة ال4 نعمل (4س و2ع و4س) ممكن نسمى ده مثلا كوبرى

ونكرر لنهاية السطر

اول صدفة عادى والصدفة اللى بعدها الصدفة ام 5س والصدفة الثالثة عادى زى الاولى ونعمل كوبرى وبعد كدة الصدفة الرابعة عادى والصدفة ال5 نعملها ب5س والصدفة السادسة نعملها عادى وبعد كدة نعمل كوبرى

الى نهاية السطر

السطر ده بيكون اساس لغرزة الاناناس اللى هنشتغلها بعد كدة ان شاء الله

بعد ما عملنا السطر اللى هو يعتبر اساس لغرزة الاناناس

هنبدء بقى فى عمل الاناناسة نفسها

هنبدء سطر جديد ونعمل اول صدفة وبعد كدة (فى الصدفة اللى بها 5 س)نعمل فيها 9 ع

ثم نعمل بعد كدة صدفة عادية وبعد الصدفة نعمل كوبرى زى ما اتفقنا

ونكمل بقى بالشكل ده لنهاية السطر (صدفة +9 ع+صدفة+كوبرى

بعد كدة السطر الثانى من الاناناس:

هنطلع بداية عادية كبداية كل الصفوف اللى فاتت
وبعد كدة هنعمل صدفة وبعدها 2س فقط مش 5 زى ما احنا كنا متعودين وبعدها نعمل فوق كل عمود من ال9ع اللى تحت نعمل عمود و1س

ونعمل برضو2س وصدفة ثانية وبعد كدة نعمل كوبرى

ونستمر على كدة

فوق الصدفة صدفة

وفوق الكل عمود من ال9ع (عمود و1س)

السطر الثالث من الاناناسة:

نطلع صدفة عادية ثم 3 س

ثم نعمل فى اول سلسلة بين اول عمودين من عواميد الاناناسة نعمل غرزة حشو

ثم نعمل 3س ونعمل فى تانى سلسلة بين العمودين اللى بعديهم غرزة حشو وهكذا لنهاية اول اناناسة ليصبح عندنا 7 قبب

ثم تعملى 3س وصدفة فوق تالت صدفة

نجى بقى للكوبرى هيتغير هنعمل(4س وفوق الاتنين عمود بتوع الكوبرى هنعمل عمود ثم 3س ثم عمود ثم 4س و وصدفة عادية ونكمل بقى عادى

السطر الرابع من غرزة الاناناسة:

1-نبدء صدفة عادية بعدها 3س

2-ندخل فى اول قبة من قبب الاناناسة ونعمل غرزة حشو ثم نعمل 3س وندخل فى القبة اللى بعدها ونعمل غرزة حشو وهكذا لنهاية الاناناسة ليصبح عندنا 6 قببثم 3س ثم صدفة ثم 3 س

3-والكوبرى نعمل فيه عمود فوق اول عمود وفى ال3س نعمل 5ع وعمود فوق اخر عمود ثم نعمل 3س ونكرر من اول الخطوة ( 1 )
السطر الخامس من الاناناسة:

1- نبدء بصدفة عادى +3س وندخل فى اول قبة ونعمل غرزة حشو ونكرر ليصبح عندك 5 قبب

2- الاختلاف اننا فى الكوبرى هنعمل فوق كل عمود (عمود و1 س)

3-والسطر السادس برضو نفس السطر الخامس

3- السطر السابع نفس الخطوات بس هنعمل فى الكوبرى فوق كل عمود عمود و2س
بدلا من عمود وسلسلة واحدة

السطر الثامن من الاناناسة:

1- برضو نفس الخطوات بس برضو الاختلاف فى الكوبرهنعملى فوق كل عمود (2ع+2س)

ونكرر لنهاية السطر

السطر التاسع:نفس الخطوات
وفى الكوبرى هنعمل فوق كل عمود عمود و2س يعنى هنعمل 2ع + 2س ونكرر لنهاية السطر

السطر العاشر:نفس الخطوات وهنا هنلاقى ان فضل قبة واحدة من قبب الاناناسة

الاختلاف هنا برضو فى الكوبرى اننا بعد 3 صدفة وقبل الكوبرى هنعمل 4س

وبعد الكوبرى برضو هنعمل 4س

وهنعمل فى الكوبرى بدل 2ع هنعمل (3ع)+ ال2س اللى بنعملهم ونكمل 4س ونكمل بقى نفس الخطوات

كدة الحمد لله فاضل سطرين بس ان شاء الله هكملهملك بكرة

السطر فبل الاخير من البترون:

انتى هتشتغلى بقى عادى اول صدفة

وبعد كدة هتشتغلى ثالث صدفة على طول يعنى مش هنشتغل حاجة فى صدفة الاناناسة

وبعد كدة هتعملى 4س وتعملى الكوبرى زى السطر اللى فات بالضبط مع اختلاف ان بين كل 3 عواميد وبعضهم هتعملى 3س وبعد ما تخلصى الكوبرى تعملى 4س وتبدءاى من الاول تانى

السطر الاخير من البترون:

هتجى فى ال2س اللى فى منتصف الصدفة وتعملى 2 ع مضمومة مع بعض

والصدفة اللى بعدها كذلك

ثم تعملى6 س

وتجى عند الكوبرى تعملى فوق كل عمود عمود وتضمى ال3ع مع بعض وبعد كدة تعملى 6س وبعدكدة تضمى ال3ع اللى بعدهم مع بعض وتكررى كده لنهاية الكوبرى

وبعد الكوبرى تعملى 6س وتعملى فى الصدفة اللى بعدها زى ماعملنا فى الصدفة الاولى بالضبط يعنى هتكررى الخطوات

وبكدة ياقمراية يكون البترون الاول خلص الحمد لله

بس اسمحيلى انا مش هكون متواجدة فى المنتدى لحد يوم الاثنين القادم ان شاء الله اول ما ارجع هنبدء فى شرح البترون الثانى سامحينى بس اصل المكان اللى هكون فية مش فيه نت وكدة اول ما ارجع ان شاء الله هنبدء فى البترون الثانى ويارب يكون الشرح واضح وتحت امرك فى اى سؤال

بترون الفراشة:

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذا الرابط]

[ندعوك للتسجيل في المنتدى أو التعريف بنفسك لمعاينة هذا الرابط]
[ندعوك للتسجيل في المنتدى أو التعريف بنفسك لمعاينة هذا الرابط]

اول حاجة تعملى 8 س وتقفليهم بغرزة منزلقة

بعد كدة تطلعلى ب3 س وتعملى 23 عمود بلفة داخل الدائرة وبعد كدة تقفليهم بمنزلقة وكدة هيصبح عندك 24 عمود

السطر الجديد تطلعى 4 س وتعملى عمود فوق العمود اللى بعدة ثم 1س وعمود فوق العمود اللى بعدة ثم 1س وعمود فوق العمود اللى بعدة و1س وعمود فوق العمود اللى بعده وبكدة اصبح عندك 5 ع بينهم 1س

السطر اللى بعده هتطلعى 5س وتعملى عمود فوق العمود اللى تحته وتمشى كدة فوق كل عمود عمود وبينهم 2 س وبرضو كدة هيكون عندك 5 ع

السطر اللى بعده تطلعى 6 س وتعملى فوق اول عمود عمود وفوق كل عمود عمود وبين كل عمود والتانى 3س

السطر اللى بعده تطلعى 7س وفوق اول عمود عمود وفوق كل عمود عمود وبين كل عمود والتانى 4س

السطر الاخير تطلعى 6 س وتعملى فوق اول عمود غرزة النصف عمود ثم 5س وفى العمود اللى بعده تعملى عمود بلفة ثم تعملى 5س وفى العمود اللى بعده تعملى عمود بلفتين وثم تعملى 5س وفى اخر عمود تعملى عمود ب3لفات

وبكدة نكون خلصنا اول جزء من النصف اللى تحت فى الفراشة

بعد ما خلصنا اول جناح من الجزء اللى تحت نجى للجناح التانى هنجى عند الدايرة وتعدى 9 عمود وتبدءى من عند تاسع عمود ده تعملى نفس اللى عملناه فى الجناح الاول بس خلى بالك ال9 عواميد دول من ناحية الجناح اللى اشتغلناه عشان الجزء التانى هنعمل من عنده الجناحات اللى فوق

بعد كدة هنبدء فى الجزء اللى فوق بقى:

ركزى معايا فى الجزء ده اوى

انتى طبعا فى الاول عملتى الدايرة وعملتى فيها 24 عمود وقفلتى بغرزة منزلقة صح كدة

هتجى بقى عند العمود ال13 من جهة اليمين ونبدء الجناح اللى فوق

1-هتطلعى 4س وتعملى فى العمود اللى بعدها عمود ثم1س وعمود فوق العمود اللى بعدها ثم 1س وعمود فوق العمود اللى بعدها

ثم 1س وعمود بلفتين فوق العمود اللى بعدها ثم 1س ثم عمود ب3 لفات فقوق العمود اللى بعدها وده كان السطر الاول

السطر التانى :تطلعى 7 س وتعملى فوق العمود اللى بعدها عمود بلفتين

وثم تعملى 2س وعمود بلفة فوق العمود اللى بعدها

ثم 2س وعمود بلفة فوق العمود اللى بعده ثم 2س وعمود فوق العمود اللى بعده ثم 2س وعمود فوق اخر عمود وده كدة السطر التانى

السطر التالت:تطلعى 6س وتعملى عمود فوق العمود اللى بعده

وتفضلى كدة تعملى 3س وعمود فوق كل عمود ماعدا اخر عمودين هتعملى العمود القبل الاخير هتعمليه عمود بلفتين وثم 3س ثم عمود ب3 لفات فوق اخر عمود

السطر الرابع: هتطلعى 9س وتعملى فى العمود اللى بعده عمود بلفتين ثم تعملى 4س وعمود بلفة واحدة فوق العمود اللى بعده وتفضلى كدة فوق كل عمود عمود وبينهم 4س

السطر الخامس:تطلعى 8س وتعملىعمود بلفة فوق العمود وتمشى فوق كل عمود عمود وبينهم 5س ماعدا اخر عمودين هتعملى العمود القبل الاخير بلفيتين ثم 5س واخر عمود هتعمليه ب3 لفات

السطر الاخير : هتطلعى 11س وتعملى فى العمود اللى بعده عمود ب3 لفات ثم6س وعمود بلفتين فوق العمود اللى بعده ثم 6س ثم عمود فوق العمود اللى بعده الى نهاية السط ماعدا اخر عمود هتعملى 7س وتدخلى فى العمود اللى تحته بمنزلقة

وبكدة يكون اخر حاجة فى اول جناح من فوق ناقص جناح واحد بس والتفنيش
الجناح الاخير هتجى من عند الجناح اللى فوق وتسيبى من نهايته 3س وتدخلى فى رابع عمود وتكررى نفس الخطوات اللى مشينا فيها فى الجناح التانى

هنبدء بقى فى التفنيش وده اخر حاجة

بسم الله :

هنبدء من الجناحات اللى تحت الاول بصى انتى هتجى من عند بداية الجناح الاول من تحت من ناحية الدايرة ( اول جناح اشتغلناه)وتعملى التالى :
1- هتعملى فى اول 3 سطور من الحرف طبعا تعملى فى اول عمود من كل سطر تعملى 3 غرزة حشو

يعنى 3 غ ح فى 3 سطور يطلع عندك 9 غ ح تمام كدة

2-وتجى عند السطر ال4 وال5 وتعملى فى اول عمود منهم 5 عمود ثم غرزة بيكو ثم 4 عمود (خلى بالك دول فى السطرين مع بعض)

3-ثم تعملى غرزة حشو فى تانى عمود من السطر الخامس (من فوق) ثم فى ال6 س اللى بعده تعملى 4عمود وغرزة بيكو و3 عمود

4- وفى العمود اللى بعده تعملى غ ح ثم تكررى الخطوة السابقة اللى هى 4 ع وغرزة بيكو و3 عثم غرزة حشو فى العمود اللى وراه

5-تجى بقى فى الدوران اللى جى ده تعملى الاتى ( تعملى 9 عمود ثم تعملى سلاسل بالطول اللى تحبيه (عشان ده الرباط اللى هنربط منه )وبعد ماتعملى الطول اللى تحبيه تتنى السلسلة دى نصفين لحد ماتوصلى تانى للجناح الجزء ده مهم

6-تعملى 10 ع ثم غرزة حشو ( خلى بالك ان كل ده فى الدوران اللى قلنا عليه)

7-تسيبى بقى السطر اللى بعده ونشتغل على السطر اللى بعدة من الحرف طبعا (هتعملى 4 عمود ثم غرزة بيكو ثم 3 ع

8-تسيبى السطر اللى بعده وتعملى فى اللى بعده نفس الخطوة السابقة

9-كدة وصلنا للدايرة مرة تانية تعملى بقى 4 غرزة حشو فوق كل عمود يقبلك لحد ماتوصلى للجناح السابق

10- تعملى بقى فى اخر سلسلة من اول عمود فى السطر 4 ع ثم غرزة بيكو ثم 3 ع

11- تكررى بقى الخطوات من الخطوة رقم 7 الى الخطوة رقم 1

بس من تحت لفوق يعنى تمشى 7 ثم 6 ثم 5 .... وهكذا الى ان تصلى للخطوة الاولى

بكدة نكون انتهينا من الجناحات اللى تحت

نجى بقى للجناحات اللى فوق :

ا-تعملى فى اول عمود من اول سطر تعملى 3غرزة حشو

2-وتعملى فى كل سطر يقبلك(4ع ثم غرزة بيكو ثم 3 ع ثم غرزة حشو )وتكررى الخطوة دى فى كل سطر يقبلك ما عدا السطر الاخير بالدوران اللى بعده

3- تعملى 5ع ثم غرزة بيكو ثم 6 ع

4-تكررى الخطوة الاولى فى كل فراغ يفبل ماعدا الدوران برضو

5- تعملى (10 ع ثم سلسلة بلطول المطلوب ثم 9ع

6-تكررى الخطوة الاولى فى كل فراغ يفبل ماعدا الدوران برضو

7- تكررى بقى الخطوة الاولى لحد ما توصلى للدايرة

8- تعملى 4 غرزة حشو فوق كل عمود يقبلك لحد ماتوصلى للجناح التانى

9- تكررى برضو الخطوات بس من تحت لفوق من الخطوة 6 :الخطوة 1

وبكدة نكون خلصنا البترون التانى ومعلش لوفيه اى لخبطة

بس البترون ده كان صعب شوية فى الشرح وانا شرحته على قدر المستطاع لان فى حاجات ما كنتش اعرفها اوى فيه

اتمنى اكون وفقت فى الشرح ولا تنسينا من صالح الدعاء وتحت امرك فى اى استفسار

شكرا الك
تقبلي مروري

» طريقة عمل جيبة جميلة
» طريقة عمل جيبة بنوتة جميلة
» طريقة عمل جيبة للاطفال بالتفصيل
» طريقة عمل جيبة كلوش لف وطبقات
» طريقة عمل جيبة كروشيه بالباترون